Triple Wave notar þrjár bylgjulengdir, 755, 808 og 1064 nm, í sama meðferðarhaus. Bylgjulengdirnar ná misdjúpt niður í húðina og gera meðferðinni kleift að vinna með hársekkina á mismunandi dýpi.

Laserljósið beinist að litarefninu í hárinu og breytist í hita sem hefur áhrif á hársekkinn. Með tímanum vex hárið hægar, verður fíngerðara og minna áberandi.

Meðferðin virkar best á hár sem innihalda litarefni. Hún hefur því yfirleitt lítil eða engin áhrif á alveg hvít, grá eða mjög ljós hár.

Meðferðin getur hentað þegar markmiðið er að:

• draga varanlega úr óæskilegum hárvexti,
• minnka þörfina fyrir rakstur og vax,
• vinna gegn inngrónum hárum,
• draga úr ertingu eftir rakstur,
• fá sléttara og jafnara yfirbragð húðar,
• meðhöndla bæði lítil og stór svæði.

Algeng meðferðarsvæði eru meðal annars andlit, handarkrikar, bikinílína, fótleggir, bak, bringa og handleggir.

Meðferðin getur einnig verið góð lausn fyrir þau sem fá oft rauða húð, útbrot eða óþægindi eftir hefðbundnar háreyðingar-aðferðir.

Lasermeðferð getur veitt langvarandi og verulega minnkun á hárvexti. Það er þó ekki hægt að lofa að hvert einasta hár hverfi fyrir fullt og allt.

Sum hár geta komið aftur með tímanum, en þau eru oft ljósari, fíngerðari og færri en áður. Hormónabreytingar, aldur og ákveðin lyf geta einnig haft áhrif á nýjan hárvöxt.

Eftir meðferðarkúr getur því verið þörf á viðhaldsmeðferð af og til.

Hár vaxa í nokkrum vaxtarstigum og laserinn hefur mest áhrif á þau hár sem eru í virku vaxtarskeiði. Þar sem ekki eru öll hár á sama vaxtarstigi á sama tíma þarf fleiri en eina meðferð.

Algengt er að mæla með:

- Um sex til átta meðferðum til að byrja með
- Fjórum til átta vikum á milli tíma
- Viðhaldsmeðferð eftir þörfum

Tíðnin fer eftir meðferðarsvæðinu. Hár í andliti vaxa til dæmis hraðar en hár á fótleggjum og því getur verið styttra á milli tíma í upphafi.

Árangur er einstaklingsbundinn og ræðst meðal annars af háralit, hárþykkt, húðgerð, hormónum og reglulegri mætingu.

Raka á svæðið fyrir tímann samkvæmt leiðbeiningum meðferðaraðila. Hárin eiga að vera stutt en hársekkurinn þarf að vera til staðar svo laserinn geti unnið með hann.

Forðast skal að:

- Vaxa, plokka eða nota háreyðingarvél í nokkrar vikur fyrir meðferð,
- Fara í sólbað eða ljósabekk fyrir tímann,
- Nota brúnkukrem á meðferðarsvæðið,
- Bera sterk efni á svæðið rétt fyrir meðferð.

Láttu meðferðaraðila einnig vita um öll lyf, húðmeðferðir og breytingar á heilsufari.

Húðin getur verið örlítið rauð, heit eða viðkvæm eftir meðferð. Það er eðlilegt og gengur yfirleitt fljótt yfir.

Eftir tímann er gott að:

- Kæla húðina ef þörf er á,
- Nota mild og rakagefandi húðvörur,
- Forðast mjög heit böð, gufu og erfiða líkamsrækt sama dag,
- Verja svæðið vel gegn sól,
- Nota sólarvörn á svæði sem eru óvarin.

Hárin detta ekki út strax. Þau losna smám saman úr hársekkjunum á næstu dögum eða vikum.

Triple Wave er almennt ekki framkvæmd:

- Á meðgöngu,
- Yfir opin sár, sýkingar eða virkt húðútbrot,
- Á sólbrunninni eða nýlega sólbrúnni húð,
- Yfir húðflúr,
- Nálægt augum eða á augabrúnum,
- Á svæðum þar sem húðin er óvenju viðkvæm eða sködduð.

Sum lyf, þar á meðal lyf sem auka ljósnæmi húðarinnar, geta haft áhrif á hvort óhætt sé að framkvæma meðferðina. Einnig þarf að upplýsa um nýlega notkun á sterkum húðlyfjum, fyrri viðbrögð við laser og undirliggjandi húðsjúkdóma.

Ef vafi leikur á er best að hafa samband áður en tími er bókaður.